వాళ్లకు పితృత్వ సెలవులు: గోయల్‌

దిల్లీ: తల్లి లేని పిల్లల ఆలనా పాలనా చూసే రైల్వేశాఖలో పనిచేసే తండ్రులకు పితృత్వ సెలవులు ఇవ్వనున్నట్లు రైల్వేశాఖ మంత్రి పీయూష్ గోయల్‌ తెలిపారు. పిల్లల సంరక్షణ కోసం ప్రస్తుతం మహిళలకు మాతృత్వ సెలవులు ఉన్న సంగతి తెలిసిందే. అయితే లింగ సమానత్వంలో భాగంగా ఏప్రిల్‌ నుంచి పితృత్వ సెలవులు అమలు చేయనున్నట్లు రాజ్యసభలో ప్రశ్నత్తోరాల సమయంలో గోయల్ వెల్లడించారు. రెండేళ్లపాటు ఈ సెలవులు ఉంటాయని పేర్కొన్నారు.

‘‘తల్లి లేని పిల్లల తండ్రులకు ఏప్రిల్‌ నుంచి పితృత్వ సెలవులు ఇస్తున్నాం’’ అని గోయల్‌ తెలిపారు. అయితే తొలి ఏడాది సెలవులకు పూర్తి జీతం, రెండో ఏడాదికి 80 శాతం జీతం చెల్లిస్తామన్నారు. తల్లి లేని పిల్లల తండ్రులకు పితృత్వ సెలవులు ఇవ్వాలని 2018 డిసెంబర్‌ 11న కేంద్ర ప్రభుత్వం నిర్ణయం తీసుకుంది. ఈ ఏడాది ఏప్రిల్‌ నుంచి రైల్వేశాఖ అమలు చేయనుంది.