ప్లాస్మా దానం చేయండి... 

తబ్లిగీ జమాత్‌ అధ్యక్షుడు మౌలానా సాద్‌

దిల్లీ: కరోనా వైరస్‌ సోకిన అనంతరం కోలుకున్నవారు తమ ప్లాస్మాను దానమివ్వాలని దిల్లీలోని నిజాముద్దీన్‌కు చెందిన తబ్లిగీ జమాత్‌ అధినేత మౌలానా సాద్‌ ఖంధాల్వి పిలుపునిచ్చారు. ఈ మేరకు ఆయన ఓ లేఖను విడుదల చేశారు. ఇతర తబ్లిగీ సభ్యులతో సహా తాను స్వీయ నిర్బంధంలో ఉన్నట్లు తెలిపారు. తమతోపాటు క్వారంటైన్‌లో ఉన్న చాలామందికి కొవిడ్‌-19 పరీక్షలో నెగిటివ్‌గా వచ్చినట్లు వివరించారు. ఇక కరోనా నుంచి కోలుకున్నవారు తమ ప్లాస్మాను దానం చేయాలని... బాధితులకు చికిత్సలో అది ఎంతగానో ఉపయోగపడుతుందని తెలిపారు.  రంజాన్‌ ప్రార్థనలను ఇంట్లోనే చేసుకోవాల్సిందిగా కోరుతూ ఆయన ఇటీవల ప్రకటన విడుదల చేశారు. కాగా‌ నిబంధనలను అతిక్రమించి దిల్లీలోని నిజాముద్దీన్‌లో పెద్దసంఖ్యలో ప్రజలతో సమావేశాన్ని నిర్వహించినందుకు సాద్‌, మరికొందరిపై మార్చి 31న ఎఫ్‌ఐఆర్ నమోదైన సంగతి తెలిసిందే.