కార్మికులతో ముచ్చటించిన యోగి ఆదిత్యనాథ్‌

రెండో విడత నగదు జమచేయనున్నట్లు వెల్లడి

లక్నో: మేడేను పురస్కరించుకొని ఉత్తరప్రదేశ్‌ ముఖ్యమంత్రి యోగి ఆదిత్యనాథ్‌ శుక్రవారం వీడియో కాన్ఫరెన్స్‌లో కొద్దిసేపు కార్మికులతో ముచ్చటించారు. లాక్‌డౌన్‌ కారణంగా వారు ఎదుర్కొంటున్న సమస్యలను అడిగి తెలుసుకున్నారు. అంతకుమందు జరిగిన సమావేశంలో సీఎం మాట్లాడుతూ.. లాక్‌డౌన్ కారణంగా జీవనోపాధి దెబ్బతిన్న 30 లక్షల మంది కార్మికుల బ్యాంకు ఖాతాల్లో రాష్ట్ర ప్రభుత్వం రెండో విడత రూ.1,000 జమ చేయనున్నట్లు వెల్లడించారు. ఏప్రిల్ 30న 27.15 లక్షల ఎంఎన్‌ఆర్‌ఈజీఏ కార్మికుల బ్యాంకు ఖాతాల్లో రూ.611 కోట్లు జమ చేసినట్లు తెలిపారు.

‘ఇతర రాష్ట్రాల్లో చిక్కుకున్న యూపీకి చెందిన కార్మికులు వారి రేషన్కార్డు నంబరును ఉపయోగించుకొని ఉన్నచోటనే దాని ప్రయోజనాలు పొందవచ్చు. రేషన్ కార్డు లేని వారికి, రాష్ట్ర విపత్తు ప్రతిస్పందన నిధి (ఎస్‌డీఆర్‌ఎఫ్) కింద ఆహార ప్యాకెట్లు అందిస్తోంది. దిల్లీ నుంచి దాదాపు 4 లక్షల మంది, హరియాణా నుంచి 12 వేల మంది వలసదారులు రాష్ట్రానికి క్షేమంగా తిరిగి వచ్చారు. కేంద్రం అనుమతి ఇవ్వడంతో ప్రత్యేక రైళ్ల ద్వారా ఆయా రాష్ట్రాల్లో చిక్కుకున్న వలస కార్మికులు, పర్యాటకులు, విద్యార్థులను తీసుకొచ్చేందుకు సన్నాహాలు చేస్తున్నాం’ అని వివరించారు.