ప్రపంచ సంఘీభావానికి ఇదే నిదర్శనం

డబ్ల్యూహెచ్‌వో చీఫ్‌ 

జెనీవా: కరోనా వైరస్‌ వ్యాక్సిన్‌ తయారీకి అందిన బిలియన్ల‌ డాలర్ల విరాళం, ప్రపంచ దేశాల ఐక్యతకు గట్టి నిదర్శనమని ప్రపంచ ఆరోగ్య సంస్థ చీఫ్‌ టెడ్రోస్‌ అథనోమ్‌ తెలిపారు. యూరోపియన్‌ కమిషన్‌ నిర్వహించిన వీడియో సమావేశంలో పాల్గొన్న ప్రపంచ ఆరోగ్య సంస్థ చీఫ్‌.. ‘‘ప్రపంచ దేశాల మధ్య మంచి సంఘీభావం ఉందనేందుకు ఇది శక్తిమంతమైన, స్ఫూర్తినిచ్చే ఉదాహరణ. ప్రపంచానికి ఉమ్మడి శత్రువు అయిన కరోనాను ఎదుర్కొనేందుకు ఏకమవడానికి... ఐకమత్యంతో ప్రపంచ భవిష్యత్తును నిర్మించుకునేందుకు కూడా ప్రపంచ దేశాలకు ఇది ఓ మంచి అవకాశం.’’ అన్నారు. 

కొవిడ్‌-19 ను నిరోధించే వ్యాక్సిన్‌ తయారీ, పంపిణీల కోసం 7.4 బిలియన్‌ యూరోలు (సుమారు 8.1 బిలియన్‌ డాలర్లు) విరాళాల రూపంలో సమకూరినట్లు ఆయన ప్రకటించారు. అయితే, అంతర్జాతీయంగా రెండున్నర లక్షలకు పైగా మరణాలకు కారణమై, 35 లక్షలకు మందికి సోకిన కొవిడ్ మహమ్మరిని ఎదుర్కోవటానికి ఇది కొంతమేరకు మాత్రమే ఉపయోగపడగలదని ఆయన అన్నారు. రానున్న కాలంలో వ్యక్తిగత రక్షణ తొడుగులు, ఆక్సిజన్‌ తదితర అత్యవసర వైద్య పరికరాల కొనుగోలుకు మరింత ఆర్థిక సహకారం కావాలని ఆయన అభిప్రాయపడ్డారు.