పోలీసులే వచ్చి ఎఫ్‌ఐఆర్ నమోదు చేస్తారు

భోపాల్: పోలీసులే ఫిర్యాదు చేసిన వ్యక్తి ఇంటికెళ్లి ఎఫ్‌ఐఆర్ నమోదు చేసుకొనేలా మధ్యప్రదేశ్ ప్రభుత్వం సోమవారం కొత్త వ్యవస్థను అందుబాటులోకి తెచ్చింది. భోపాల్‌తో సహా 23 పోలీసు స్టేషన్లలో పైలట్‌ ప్రాజెక్టు కింద ఈ విధానాన్ని తీసుకువచ్చింది. ఆ రాష్ట్ర హోం మంత్రి నరోత్తమ్ మిశ్రా దీనిపై మాట్లాడుతూ.. మూడు నెలల పాటు ఈ విధానాన్ని అమలు చేస్తామని, ఇది కనుక విజయవంతమైతే రాష్ట్రం మొత్తం అమలు చేస్తామని వెల్లడించారు. దీని కింద ఫిర్యాదుదారు పోలీసు హెల్ప్‌లైన్‌ ద్వారా పోలీసులకు ఫిర్యాదు చేస్తాడు. ఫస్ట్ రెస్పాన్స్‌ వెహికిల్(డయల్ 100) సంబంధిత ప్రాంతానికి వెళ్లి ఎఫ్ఐఆర్‌ను నమోదు చేస్తుంది.  ప్రస్తుతానికి వాహనాల దొంగతనం, ఘర్షణలు వంటి కొన్ని చిన్న కేసులను మాత్రమే నమోదు చేయనున్నారు. కరోనా వైరస్‌ నేపథ్యంలో సామాన్యులు పోలీసు స్టేషన్‌కు వచ్చి కేసు నమోదు చేయడం కష్టమవుతోందని, అందుకే ఈ విధానాన్ని తీసుకువచ్చామని ఉన్నతాధికారులు వెల్లడించారు. ఈ ప్రయోగం విజయవంతమైతే మరిన్ని ప్రాంతాలకు విస్తరిస్తామని తెలిపారు.