కార్మికులు గమ్యం చేరే వరకు శ్రామిక్‌ రైళ్లు

దిల్లీ: వలస కార్మికులు వారి గమ్యం చేరే వరకు శ్రామిక్‌ రైళ్లు నడుపుతామని రైల్వే బోర్డు చైర్మన్‌ వినోద్‌ యాదవ్‌ స్పష్టం చేశారు. రాష్ట్రాలు కోరిన వెంటనే అదే రోజు ప్రత్యేక రైళ్లను ఏర్పాటు చేసి, మరుసటి రోజు నడుపుతామని వినోద్‌ కుమార్‌ తెలిపారు. సూరత్‌ నుంచి సివాన్‌కు రైలు చేరడానికి 9రోజులు పట్టిందని కొన్ని మీడియాల్లో వచ్చిన వార్తలు అవాస్తవమన్నారు. కేవలం ఇది రెండు రోజుల్లోనే చేరినట్లు వినోద్‌ కుమార్‌ తెలిపారు. ఇప్పటివరకు నడిపిన 3,840 రైళ్లలో కేవలం 4మాత్రమే వాటి గమ్యస్థానానికి చేరడానికి 72గంటల సమయం తీసుకున్నట్లు రైల్వే బోర్డు ఛైర్మన్‌ ప్రకటించారు. వీటిలో 70 రైళ్లను మాత్రమే మిగతా మార్గాల ద్వారా మళ్లించామన్నారు. ఈ రైళ్లలో ప్రయాణించే వారికి ఆహారాన్ని అందించేందుకు సాధ్యమైనంత వరకూ ప్రయత్నం చేయడంతో పాటు దీన్ని ఎప్పటికప్పుడు పర్యవేక్షిస్తున్నామని తెలిపారు.