దొంగలను పట్టుకున్న పోలీసులకు సోకిన కరోనా

ముంబయి: దొంగలను అరెస్టు చేసి, వారిని కోర్టుకు తరలించిన పదిమంది పోలీసులకు కరోనా పాజిటివ్‌గా తేలింది. ముంబయిలోని కుర్లా ప్రాంతం నెహ్రూనగర్‌ పోలీస్‌స్టేషన్‌కు చెందిన పోలీసులు చెంబూర్‌లోని ఓ ఎలక్ట్రానిక్‌ దుకాణంలో చోరీ కేసును ఛేదించారు. దొంగతనంలో పాలుపంచుకున్న ఏడుగురు ముఠా సభ్యులను గతవారం అదుపులోనికి తీసుకొని పోలీసుస్టేషన్‌కు తరలించారు. అనంతరం దొంగలకు కొవిడ్‌-19 పరీక్షలు నిర్వహించగా అందులో ఐదుగురికి పాజిటివ్‌గా నిర్ధరణ అయింది. దీంతో వారిని ఆసుపత్రికి తరలించి చికిత్స అందిస్తున్నారు. అనంతరం ఆ దొంగలను అదుపులోనికి తీసుకొని విచారించిన, వారిని కోర్టుకు తరలించిన పదిమంది పోలీసులకు పరీక్షలు నిర్వహించగా వారందరికి పాజిటివ్‌గా తేలింది. ప్రస్తుతం పోలీసులు కూడా ఆసుపత్రిలో చికిత్స పొందుతున్నారు.