పాక్‌ కాల్పుల్లో ఆర్మీ జవాను మృతి

కశ్మీర్‌ : పాకిస్థాన్‌ పదేపదే కాల్పుల విరమణ ఒప్పందాన్ని ఉల్లంఘిస్తోంది. రాజౌరి జిల్లా నౌషెరా సెక్టార్‌లో పాక్‌ కాల్పుల్లో ఓ ఆర్మీ జవాను అమరుడయ్యారు. కృష్ణఘాటి, నౌషెరా సెక్టార్‌లో పాక్‌ బలగాలు భారీగా కాల్పులకు పాల్పడ్డాయి. పాక్‌ కవ్వింపు చర్యలకు భద్రతాబలగాలు దీటుగా బదులిచ్చాయి. తెల్లవారుజామున భారత్‌,పాక్‌ బలగాల మధ్య 3 గంటలపాటు కాల్పులు చోటుచేసుకున్నాయి.

సరిహద్దుల వెంట తరచూ కాల్పుల విరమణ ఒప్పందానికి పాక్‌ తూట్లు పొడుస్తోంది. ఈ నెలలో పాక్‌ బలగాల కాల్పుల్లో నలుగురు జవాన్లు ప్రాణాలు కోల్పోయారు. 

మరోవైపు అనంత్‌నాగ్‌ జిల్లా కాప్రాన్‌ అటవీప్రాంతంలో ఉగ్రవాదులు ఉన్నారన్న సమాచారంతో భద్రతాబలగాలు తనిఖీలు చేపట్టాయి. దీంతో భద్రతాబలగాలపై ఉగ్రవాదులు కాల్పులకు తెగబడ్డారు. భద్రతాదళాలు, ఉగ్రవాదుల మధ్య కాల్పులు కొనసాగుతున్నాయి.