ఎన్‌కౌంటర్‌లో ఇద్దరు ఉగ్రవాదుల హతం

శ్రీనగర్‌: జమ్మూ-కశ్మీర్‌లో ఉగ్రవాదులతో జరిగిన ఎదురుకాల్పుల్లో భద్రతా బలగాలు ఇద్దరు ముష్కరుల్ని మట్టుబెట్టాయి. అనంత్‌నాగ్‌ జిల్లా వాఘామా ప్రాంతంలో మంగళవారం ఉదయం ఈ ఘటన చోటుచేసుకుంది. ఆ ప్రదేశంలో ముష్కరులు నక్కి ఉన్నారన్న పక్కా సమాచారంతో జమ్మూకశ్మీర్‌ పోలీసులు సాయుధ బలగాలతో కలిసి నిర్బంధ తనిఖీలు చేపట్టారు. ఈ క్రమంలో తమపై కాల్పులకు తెగబడ్డ ముష్కరులపై దళాలు ఎదురుకాల్పులు జరిపాయి. దీంతో ఇద్దరు ఉగ్రవాదులు అక్కడికక్కడే మృతిచెందారు. రెండు రోజుల వ్యవధిలో ఈ జిల్లాలో ఇది రెండో ఎన్‌కౌంటర్‌. నిన్న జరిగిన కాల్పుల్లో ఓ హిజ్బుల్‌ కమాండర్‌ సహా ముగ్గురు ఉగ్రవాదులు హతమైన విషయం తెలిసిందే.