దిల్లీలో మళ్లీ కంపించిన భూమి

దిల్లీ: దేశ రాజధాని దిల్లీలో శుక్రవారం మరోసారి భూమి కంపించింది. సాయంత్రం 7 గంటల ప్రాంతంలో రిక్టరు స్కేలుపై భూకంప తీవ్రత 4.7గా నమోదైనట్లు జాతీయ భూకంప అధ్యయన విభాగం పేర్కొంది. హరియాణాలోని గురుగ్రామ్‌కు నైరుతి దిశగా 60 కిలోమీటర్ల దూరంలో భూకంప కేంద్రం ఉన్నట్లుగా తెలిపింది. కొన్ని సెకన్లపాటు భూమి కంపించిందని వెల్లడించింది. ప్రాణ, ఆస్తి నష్టంపై ఇంకా ఎలాంటి సమాచారం అందలేదని తెలిపింది. గడిచిన రెండు నెలల్లో దిల్లీలో 7 సార్లు భూమి కంపించింది. రిక్టరు స్కేలుపై 2.1 తీవ్రత నమోదవుతూ జూన్‌ 8న చివరిసారి రాజధానిలో భూమి కంపించింది. ఈ ప్రకంపనల పరంపర జాతీయ రాజధాని ప్రాంతంలో భారీ భూకంపం సంభవిస్తుందనే ఆందోళనలకు తావిస్తోంది.