Oxygen ఇంట్లో ఉన్నవారికి కూడా..

దిల్లీ ప్రభుత్వం నిర్ణయం

దిల్లీలో ఆక్సిజన్‌కు విపరీతంగా డిమాండ్‌ ఏర్పడిన నేపథ్యంలో ఇంట్లో (హోం ఐసొలేషన్‌) ఉన్న కరోనా బాధితులకు ఆన్‌లైన్‌ ద్వారా ఆక్సిజన్‌ను పంపిణీ చేస్తామని ఆ రాష్ట్ర ప్రభుత్వం ప్రకటించింది. అంబులెన్స్‌లు, నర్సింగ్‌ హోమ్‌లు, ఇతర కొవిడ్‌ ఆసుపత్రులకు కూడా పంపిణీ చేస్తామని గురువారం విడుదల చేసిన ఓ ప్రకటనలో పేర్కొంది. ఇందుకోసం ప్రజలు దిల్లీ అధికారిక వెబ్‌సైట్లో ఫొటో ఐడీ, ఆధార్, కొవిడ్‌ పాజిటివ్‌ నివేదిక సహా సంబంధిత వివరాలను నమోదు చేసి దరఖాస్తు చేసుకోవాలని సూచించింది. ఆక్సిజన్‌ సిలిండర్ల సరఫరా బాధ్యత జిల్లా మేజిస్ట్రేట్లు చేపట్టాలని ఈ సందర్భంగా ప్రభుత్వం ఆదేశించింది. డీలర్ల వద్ద ఉన్న నిల్వల ప్రకారం జిల్లా మేజిస్ట్రేట్‌.. తేదీ, సమయం, పంపిణీ కేంద్రం చిరునామా మొదలైన వివరాలతో దరఖాస్తుదారులకు ఈ-పాస్‌లను మంజూరు చేస్తారని వెల్లడించింది.