India to UK flights: కొండెక్కిన టికెట్‌ ధరలకు కళ్లెం! 

భారత్‌-బ్రిటన్‌ మధ్య ఇకపై వారానికి 60 విమానాలు 

దిల్లీ: భారత్‌-బ్రిటన్‌ మధ్య పరిమిత సంఖ్యలో ప్రత్యేక విమానాల రాకపోకల కారణంగా టికెట్‌ ధరలు కొండెక్కుతుండటంతో కేంద్ర ప్రభుత్వం దిద్దుబాటు చర్యలకు ఉపక్రమించింది. రెండు దేశాల మధ్య ప్రస్తుతం వారానికి 30 విమానాలనే అనుమతిస్తుండగా.. ఆ సంఖ్యను తాజాగా 60కి పెంచింది. కొత్త పరిమితి ఈ నెల 16 నుంచి అమల్లోకి వస్తుందని విమానయాన మంత్రిత్వ శాఖ గురువారం వెల్లడించింది. దీనిప్రకారం భారత్‌-బ్రిటన్‌ మధ్య భారతీయ విమానయాన సంస్థలు 30 విమానాలను, బ్రిటన్‌ సంస్థలు మరో 30 విమానాలను ప్రతి వారం నడపనున్నాయి. మన దేశ కోటాలో ఉన్న 30లో.. ఎయిరిండియాకు 26, విస్తారాకు 4 కేటాయించారు. దిల్లీ-లండన్‌ మధ్య విమాన టికెట్‌ (ఎకానమీ తరగతి) ధర ఒక్కోటి రూ.1.2 లక్షల నుంచి రూ.3.95 లక్షల వరకు పలుకుతున్నట్లు వెలుగులోకి రావడం ఇటీవల కలకలం సృష్టించిన సంగతి గమనార్హం.