Covid: కొవిడ్‌ బాధిత చిన్నారుల్లో ఊపిరితిత్తులు పదిలమే!

లండన్‌: కొవిడ్‌-19 ప్రధానంగా ఊపిరితిత్తులపై ప్రభావం చూపే ఇన్‌ఫెక్షన్‌. అయితే మహమ్మారి వల్ల చిన్నారులు, కౌమారప్రాయుల్లో ఈ అవయవ పనితీరు పెద్దగా దెబ్బతినడంలేదనే సానుకూలాంశాన్ని శాస్త్రవేత్తలు గుర్తించారు. ఉబ్బస వ్యాధి ఉన్నవారిలోనూ ఇలాంటి పరిస్థితే కనిపించిందని తెలిపారు. అయితే వీరు ఒక సెకనులో  గట్టిగా బయటకు వదలగలిగే గాలి పరిమాణం ఒకింత తక్కువగా ఉంటున్నట్లు గుర్తించారు. స్వీడన్‌లోని కరోలిన్‌స్కా ఇన్‌స్టిట్యూట్‌ శాస్త్రవేత్తలు ఈ పరిశోధన చేశారు. ఈ వివరాలను ‘యూరోపియన్‌ రెస్పిరేటరీ సొసైటీ ఇంటర్నేషనల్‌ కాంగ్రెస్‌’ కార్యక్రమంలో విడుదల చేశారు. తీవ్రస్థాయి ఇన్‌ఫెక్షన్‌ బారినపడినవారిని మినహాయిస్తే పిల్లలు, కౌమారప్రాయుల్లో ఊపిరితిత్తులు దెబ్బతినలేదని తేల్చారు. ‘‘ఇన్‌ఫెక్షన్‌ తగ్గాక ఊపిరితిత్తులపై మహమ్మారి ప్రభావం ఎలా ఉంటుందోనన్న ఆందోళనలు చెలరేగాయి. వ్యాధి తీవ్రత తక్కువగా ఉన్న చిన్నవయస్కుల విషయంలో ఈ సందేహాలు ఎక్కువగా వచ్చాయి’’ అని కరోలిన్‌స్కా ఇన్‌స్టిట్యూట్‌ పరిశోధకురాలు ఇదా మోగెన్సెన్‌ చెప్పారు. ఈ అధ్యయనంలో 661 మందిపై పరిశోధన జరిపారు. వీరి నుంచి ఊపిరితిత్తుల పనితీరుకు సంబంధించిన కీలక పరామితులు, ఇన్‌ఫ్లమేషన్, తెల్ల రక్తకణాలను పరిశీలించారు.