Hacking: హ్యాకింగ్‌లో అధిక వాటా రష్యాదే 

తాజా నివేదికలో మైక్రోసాఫ్ట్‌ వెల్లడి 

బోస్టన్‌: అమెరికా ప్రభుత్వ సంస్థలను లక్ష్యంగా చేసుకొని రష్యా ఎక్కువగా హ్యాకింగ్‌కు పాల్పడుతోందని దిగ్గజ సాంకేతిక కంపెనీ మైక్రోసాఫ్ట్‌ ఓ నివేదికలో వెల్లడించింది. గత ఏడాది జులై నుంచి ఈ ఏడాది జూన్‌ మధ్య తాము గుర్తించిన హ్యాకింగ్‌ కార్యకలాపాల్లో 58%.. రష్యా ప్రభుత్వ ప్రాయోజితమైనవేనని తెలిపింది. అమెరికా తర్వాత అధికంగా ఉక్రెయిన్, బ్రిటన్, నాటోలోని ఐరోపా సభ్య దేశాలను ఆ దేశ హ్యాకర్లు లక్ష్యంగా చేసుకుంటున్నారని పేర్కొంది. డిజిటల్‌ రక్షణ వార్షిక నివేదికలో ఈ మేరకు పలు కీలక విషయాలను వెల్లడించింది. రష్యా మద్దతున్న హ్యాకర్లు తమ కార్యకలాపాల్లో 32% వరకు విజయవంతమవుతున్నారని తెలిపింది. తాము గుర్తించిన హ్యాకింగ్‌ ప్రక్రియల్లో చైనా ప్రాయోజితమైనవి 8% ఉన్నాయని వెల్లడించింది. అంతకుముందు ఏడాది ఆ దేశం వాటా 12%గా ఉన్న సంగతిని గుర్తుచేసింది. అమెరికా హ్యాకింగ్‌ కార్యకలాపాలకు సంబంధించిన వివరాలను నివేదికలో పేర్కొనలేదు.