Covid Vaccine: టీకా వేసుకుంటే.. వంటనూనె, ఫోన్లు

అహ్మదాబాద్‌ మున్సిపల్‌ కార్పొరేషన్‌ ప్రోత్సాహకాలు

అహ్మదాబాద్‌: గుజరాత్‌లోని అహ్మదాబాద్‌ మున్సిపల్‌ కార్పొరేషను (ఏఎంసీ)లో కొన్ని ప్రాంతాలు కొవిడ్‌-19 వ్యాక్సినేషనులో వెనుకబడి ఉండటంతో అధికారులు ప్రోత్సాహకాలు ప్రకటించి లక్ష్యసాధనకు కృషి చేస్తున్నారు. ముఖ్యంగా మురికివాడల్లో కొన్నిచోట్ల ఈ వెనుకబాటు కనిపించడంతో మొదటి డోసు వ్యాక్సినేషనులో వందశాతం లక్ష్యాన్ని సాధించేందుకుగాను టీకా తీసుకున్నవారికి వంటనూనె ప్యాకెట్లు అందిస్తున్నారు. లక్కీడ్రా పెట్టి రూ.10 వేల విలువ చేసే ఫోన్లు కూడా ఇస్తున్నారు. ఈ విధంగా శనివారం పది వేల వంటనూనె ప్యాకెట్లు పంపిణీ చేయగా.. ఆదివారం నాటికి ఆ సంఖ్య 20 వేలకు చేరింది. లక్కీ డ్రాలో 25 మంది ఫోన్లు గెలుచుకున్నట్లు ఏఎంసీ అధికారి తెలిపారు. ఈ ప్రయత్నంలో యువ అన్‌స్టాపబుల్‌ ఆర్గనైజేషన్‌ తమకు సహకరిస్తున్నట్లు వెల్లడించారు.