95 దేశాలకు 7 కోట్ల టీకా డోసుల సరఫరా 

బ్రిక్స్‌ సమావేశంలో కేంద్రమంత్రి వెల్లడి

దిల్లీ: ప్రపంచవ్యాప్తంగా 95 దేశాలకు ఈనెల 22 వరకు 7.07 కోట్ల కొవిడ్‌ టీకా డోసులను భారత్‌ అందజేసినట్లు కేంద్ర మంత్రి జితేంద్ర సింగ్‌ శుక్రవారం తెలిపారు. 9వ బ్రిక్స్‌ దేశాల సైన్స్‌ అండ్‌ టెక్నాలజీ శాఖ మంత్రుల సమావేశానికి ఆయన అధ్యక్షత వహించి ప్రసంగించారు. ప్రపంచ నవకల్పనల సూచిలో బ్రిక్స్‌ (బ్రెజిల్, రష్యా, ఇండియా, చైనా, సౌత్‌ ఆఫ్రికా) దేశాలు తగిన స్థానం సంపాదించేంద]ుకు కృషి చేయాలని పిలుపునిచ్చారు. శాస్త్ర, సాంకేతిక రంగాలు, నవకల్పనల్లో సహకారాన్ని పెంపొందించుకోవడం ద్వారానే ఇది సాధ్యమని అన్నారు. ‘వ్యాక్సిన్‌ మైత్రి’ కార్యక్రమంలో భాగంగా భారత్‌ ప్రపంచవ్యాప్తంగా పలు దేశాలకు టీకాలను అందజేస్తున్నట్లు చెప్పారు. సమావేశానికి ఆయా దేశాల మంత్రులు హాజరయ్యారు.