శస్త్రచికిత్సలు విఫలం..  25 మంది చూపు కోల్పోయే ప్రమాదం!

ముజఫర్‌పుర్‌: బిహార్‌లోని ముజఫర్‌పుర్‌ జిల్లాలో వైద్యుల నిర్లక్ష్యం వల్ల పలువురు కంటి చూపు కోల్పోయారు. బాధితులకు నిర్వహించిన కేటరాక్ట్‌ ఆపరేషన్‌ విఫలమైందని అధికారులు తెలిపారు. ఆపరేషన్‌ తర్వాత కంట్లో మంట, నొప్పిగా ఉందని బాధితులు వాపోయినా.. వైద్యులు పట్టించుకోలేదు. ఫలితంగా ఇప్పటికే నలుగురు కళ్లు తీవ్రంగా దెబ్బతిన్నాయి. వారంతా కంటి మార్పిడి చికిత్సలు చేయించుకున్నారు. మరికొందరు బాధితులకు సైతం ఈ శస్త్రచికిత్స చేయించుకోవాల్సిన గత్యంతరం ఏర్పడింది. మొత్తం 25 మందికి ఈ చికిత్స జరిగినట్లు తెలుస్తోంది. జిల్లాలోని జురాన్‌ ఛాప్రా ప్రాంతంలో ఈ కంటి ఆస్పత్రి ఉంది. నవంబరు 22న ఆస్పత్రిలో కేటరాక్ట్‌ ఆపరేషన్‌ క్యాంపు నిర్వహించారు. ఈ సమయంలోనే పదుల సంఖ్యలో బాధితులు చికిత్స చేయించుకున్నారు. వైద్యుల నిర్లక్ష్యం కారణంగా కంటి చూపు పోయే ప్రమాదం తలెత్తిందని బాధితులు వాపోతున్నారు. దీనిపై సివిల్‌ సర్జన్‌ డాక్టర్‌ వినయ్‌కుమార్‌ శర్మకు సమాచారం అందించారు. బాధితులను ఇతర ఆస్పత్రులకు తరలించామని.. ఘటనపై  విచారణకు ఆదేశించామని వినయ్‌కుమార్‌ చెప్పారు.