Misfire: గురితప్పిన తూటా.. తల్లి ఒడిలోని బిడ్డ మృతి!

ఏనుగుల గుంపును అటవీ సిబ్బంది తరుముతుండగా అపశ్రుతి

బోకో: ఏనుగుల గుంపును తరిమేందుకు అటవీ సిబ్బంది జరిపిన కాల్పులకు... అమ్మ ఒడిలో సేదతీరుతున్న రెండేళ్ల చిన్నారి శాశ్వతంగా ఒరిగిపోయింది! అస్సాంలోని కామరూప్‌ జిల్లాలో ఈ ఘటన చోటుచేసుకుంది. బోకోలోని బోండపారా ప్రాంతానికి ఇటీవల ఏనుగులు గుంపుగా వచ్చాయి. వాటిని తరిమేందుకు అటవీ సిబ్బంది కొద్దిరోజులుగా ప్రయత్నిస్తున్నారు. ఏనుగులను బెదిరించేందుకని గురువారం రాత్రి వారు తుపాకీలతో కాల్పులు జరిపారు. అయితే, ఓ తూటా ప్రమాదవశాత్తూ... అక్కడికి సమీపంలోని ఓ ఇంటి ముందు అమ్మఒడిలో కూర్చున్న బిడ్డ శరీరంలోంచి బలంగా దూసుకెళ్లి, ఆమె తల్లిని కూడా గాయపరిచింది! గార్డులు వెంటనే వారిద్దర్నీ బోకోలోని ఆసుపత్రికి తీసుకెళ్లారు. కానీ, అప్పటికే ఆ చిన్నారి చనిపోయినట్టు వైద్యులు ధ్రువీకరించారు. తీవ్రంగా గాయపడిన తల్లిని గువాహటి వైద్య కళాశాల ఆసుపత్రికి తరలించి చికిత్స అందిస్తున్నారు. ప్రస్తుతం ఆమె పరిస్థితి విషమంగా ఉంది.