కొత్త ఇంజినీరింగ్‌ కళాశాలలకు అనుమతిపై మారటోరియం కొనసాగింపు

ఈనాడు, దిల్లీ: కొన్ని మినహాయింపులతో కొత్త ఇంజినీరింగ్‌ కళాశాలలకు అనుమతుల మంజూరుపై మారటోరియాన్ని కొనసాగించాలని హైదరాబాద్‌ ఐఐటీ పాలకమండలి ఛైర్మన్‌ బీవీఆర్‌ మోహన్‌రెడ్డి కమిటీ తాజాగా సిఫార్సు చేసినట్లు కేంద్ర విద్యాశాఖ మంత్రి ధర్మేంద్ర ప్రధాన్‌ తెలిపారు. కొత్త ఇంజినీరింగ్‌ కళాశాలలకు అనుమతులపై సోమవారం లోక్‌సభలో సుభ్రత్‌పాఠక్, రవికిషన్‌ అనే ఇద్దరు సభ్యులు అడిగిన ప్రశ్నకు ఆయన సమాధానమిచ్చారు. 2012-13లో దేశంలో ఉన్న 26,95,333 ఇంజినీరింగ్‌ సీట్లలో 17,51,538 (64.98%) భర్తీకాగా, 2020-21లో 24,42,948 సీట్లకుగాను 12,75,880 (52.22%) మాత్రమే భర్తీ అయినట్లు వెల్లడించారు. పదేళ్లలో 2.67% ఇంజినీరింగ్‌ కళాశాలలు, 12.19% సీట్లు, 27.15% ప్రవేశాలు తగ్గిపోయినట్లు తెలిపారు.