డబ్బుల సంగతి చెప్పినా తీసుకోలేకపోయారు..

అమెరికాలో విద్యార్థులకు వినూత్న పరీక్ష పెట్టిన ప్రొఫెసర్‌ 

వాషింగ్టన్‌: అమెరికాలోని టెన్నెస్సీ విశ్వవిద్యాలయంలోని ప్రొఫెసర్‌ కెన్యాన్‌ విల్సన్‌.. తన విద్యార్థులు సిలబస్‌ను పూర్తిగా చదువుతున్నారో? లేదో? తెలుసుకోవాలని భావించారు. ఇందుకు విభిన్నమైన పరీక్ష పెట్టారు. ఓ సంగీత సదస్సు కోసం 3 పేజీల సిలబస్‌ను విద్యార్థులకు ఇచ్చి పూర్తిగా చదవమన్నారు. తరగతిలోని 70 మంది పేర్లు నమోదు చేసుకోగా, ఏ ఒక్కరూ పరీక్షలో ఉత్తీర్ణత సాధించలేకపోయారు. ఎందుకంటే.. ఆ సిలబస్‌లోని రెండో పేజీలో ఓ లాకర్‌కు సంబంధించిన చోటు, దాని కాంబినేషన్‌ సంకేతాలు (క్లూలు) ఉంచారు. ఆ లాకర్‌లో 50 డాలర్లు (రూ.3,800) ఉండటం విశేషం. విద్యార్థులు ఎవరూ ఆ సంగతిని కనిపెట్టలేకపోయారు. ‘‘క్లెయిమ్‌ చేసిన మొదటి వ్యక్తికి ఉచితం; లాకర్‌ నెంబర్‌ 147; కాంబినేషన్‌ 15,25,35’’ అని రెండో పేజీలో ఉంది. డిసెంబర్‌ 8తో సెమిస్టర్‌ ముగిసింది. విద్యార్థులు ఇళ్లకు వెళ్లారు. అయినా నగదు మొత్తం ఆ లాకర్‌లోనే ఉంది. ఈ విషయాన్నంతా కెన్యాన్‌ ఫేస్‌బుక్‌లో పోస్ట్‌ చేయడం విశేషం. ఈ పోస్ట్‌ గురించి ఏకంగా కెనడియన్‌ బ్రాడ్‌కాస్టింగ్‌ కార్పొరేషన్‌.. ఆయన్ను సంప్రదించింది. ఆ తర్వాత అది మరింత వైరల్‌ అయింది.