Philippines: ఫిలిప్పీన్స్‌లో 375కు పెరిగిన ‘రాయ్‌’ మరణాలు

మనీలా: ఫిలిప్పీన్స్‌లో రాయ్‌ తుపాను సృష్టించిన విధ్వంసం దృశ్యాలు క్రమక్రమంగా బయటకొస్తున్నాయి. ఈ ప్రచండ తుపాను ధాటికి మొత్తం 375 మంది మరణించారని, 56 మంది గల్లంతయ్యారని అధికారులు సోమవారం తెలిపారు. ఇప్పటికీ చాలా ప్రావిన్స్‌లలో సమాచార, విద్యుత్తు వ్యవస్థల పునరుద్ధరణ జరగలేదు. ఆహారం, మంచినీటి కోసం ఆర్తనాదాలు ఆగలేదు. చాలా గ్రామాలు, పట్టణాల్లో సమాచార వ్యవస్థ అందుబాటులోకి రాలేదని, అందువల్ల మరణించినవారి సంఖ్య పెరిగే అవకాశముందని జాతీయ పోలీసు విభాగం ప్రకటించింది. అదే సమయంలో ప్రభుత్వ విభాగాలు మరమ్మతులను యుద్ధప్రాతిపదికన చేస్తున్నట్లు వెల్లడించింది. చెట్లు కూలడం, మెరుపు వరదలు, కొండచరియలు విరిగి పడడం వంటి కారణాల వల్లే ఎక్కువ మరణాలు సంభవించినట్లు అధికారులు భావిస్తున్నారు.