Pfizer Covid Pill:కొవిడ్‌కు ఫైజర్‌ కొత్త మాత్ర..తొలిసారిగా అమెరికా ఆమోదం

వాషింగ్టన్‌: కొవిడ్‌ బాధితులకు ఊరటనిచ్చేలా అమెరికా తొలిసారి ఓ మాత్రను అందుబాటులోకి తెచ్చింది. ఇంటివద్దే చికిత్స పొందుతూ తీసుకొనేలా ఈ ఔషధానికి బుధవారం అనుమతి ఇచ్చింది. ఈమేరకు ఫైజర్‌ రూపొందించిన ‘పాక్స్‌లోవిడ్‌’ పిల్‌ను చికిత్సకు వినియోగించవచ్చని సంబంధిత అధికారులు వెల్లడించారు. చౌకగా లభించే ఈ మాత్ర కొవిడ్‌ ప్రారంభదశలో వేగవంతమైన చికిత్స అందించడానికి పనిచేస్తుందని తెలిపారు. ప్రారంభంలో ఈ ఔషధం సరఫరా చాలా పరిమితమేనని చెబుతున్నారు. కొవిడ్‌ పాజిటివ్‌గా తేలిన వారికి.. ఆసుపత్రిపాలయ్యే ముప్పు ఎక్కువగా ఉన్నవారికి ప్రారంభదశలోనూ ఈ మాత్రను వినియోగించవచ్చని అధికారులు తెలిపారు. ఈమేరకు ఫైజర్‌ మాత్రను వయోజనులకు, 12 ఏళ్లు.. ఆ పైబడిన పిల్లలకు వినియోగించేందుకు అమెరికాలోని ఆహార, ఔషధ నియంత్రణ సంస్థ (ఎఫ్‌డీఏ) అనుమతించింది.