Kerala: కేరళ హింస కేసులో 163 మంది కార్మికులు అరెస్టు

కొచ్చి: క్రిస్మస్‌ రోజు అర్ధరాత్రి ఎర్నాకుళం జిల్లాలోని కిజక్కంబలం ప్రాంతంలో చెలరేగిన హింసకు సంబంధించి 163 మంది వలస కార్మికుల్ని పోలీసులు అరెస్టు చేశారు. పోలీసులను కొట్టడం, వారి వాహనాలను ధ్వంసం చేయడంపై రెండు వేర్వేరు కేసులు నమోదయ్యాయి. న్యాయస్థానం వీరిలో 76 మందికి 14 రోజుల రిమాండ్‌ విధించింది. విందులో మొదలైన వివాదాన్ని సద్దుమణిగేలా చేసేందుకు వచ్చిన పోలీసులపై కార్మికులు దాడి చేసిన విషయం తెలిసిందే. ఈ ఘటనపై తమ సంస్థ కార్మికులు ఇంతమందిని అరెస్టు చేయడాన్ని కైటెక్స్‌ కంపెనీ ఎండీ సాబు జాకబ్‌ తప్పుపట్టారు. తనను, తన వ్యాపారాన్ని లక్ష్యంగా చేసుకునే అరెస్టులకు పాల్పడ్డారనీ, కార్మికులు తప్పు చేశారని చెప్పడానికి ఎలాంటి ఆధారాల్లేవని చెప్పారు. రాష్ట్ర ప్రభుత్వం తనపట్ల వ్యక్తిగత శత్రుత్వంతో వ్యవహరిస్తోందని ఆరోపించారు. తనను లక్ష్యంగా చేసుకుని పేద కార్మికుల్ని ఇబ్బంది పెట్టడం తగదని, కంపెనీ మూసివేతనే ప్రభుత్వం కోరుకుంటే అలాగే చేస్తానని చెప్పారు.