మౌనీ అమావాస్య వేళ గంగానదిలో.. 1.50 కోట్ల భక్తుల పుణ్యస్నానాలు

అలహాబాద్‌: కరోనా వైరస్‌ భయం ఓవైపు వెంటాడుతున్నప్పటికీ.. మౌనీ అమావాస్య సందర్భంగా సోమ,  మంగళవారాలు గంగానదిలో 1.50 కోట్ల భక్తులు పుణ్యస్నానాలు చేశారు. ప్రయాగ్‌రాజ్‌లోని గంగ, యమున, సరస్వతి (పౌరాణిక కాలం నాటి) నదుల సంగమ స్థానానికి భక్తులు పెద్దసంఖ్యలో తరలివచ్చినట్లు మాఘ్‌ మేలా అధికారవర్గాలు తెలిపాయి. విస్తృతమైన భద్రతా ఏర్పాట్లు చేశామని, గజ ఈతగాళ్లను సిద్ధం చేసి.. సీసీ టీవీలు, డ్రోన్‌ కెమెరాల ద్వారా పర్యవేక్షిస్తున్నట్లు వెల్లడించాయి. నదీతీరంలో భక్తుల చేత పిండప్రదానం చేయిస్తున్న పండా భోలా త్రిపాఠి మాట్లాడుతూ.. సోమవారం మధ్యాహ్నం 2.20 నుంచి మంగళవారం ఉదయం 11.16 దాకా మౌనీ అమావాస్య ముహూర్తమని తెలిపారు. పురాణాల ప్రకారం.. సూర్యాస్తమయానికి ముందు అమావాస్య తేదీ మొదలైతే ‘సోమవతీ అమావాస్య’ అంటారని, ఈ ముహూర్తంలో పిండప్రదానం చేస్తే పూర్వీకులు సంతోషిస్తారని చెప్పారు.