ATM: ఇది నూలు సంచుల ఏటీఎం

ఇప్పటికే వరుసగా ఆరుసార్లు స్వచ్ఛనగరంగా నిలిచి సత్తా చాటిన మధ్యప్రదేశ్‌లోని ఇందౌర్‌.. ఇప్పుడు ప్లాస్టిక్‌ రహిత నగరంగా రికార్డుల్లోకి ఎక్కేందుకు ప్రయత్నిస్తోంది. అందుకోసం అధికారులు వినూత్నంగా ఆలోచించి పర్యావరణహితమైన నూలు సంచులు అందించే ఏటీఎంలను ఏర్పాటు చేశారు. ఇందౌర్‌లో పాలిథిన్‌ నిషేధాన్ని కఠినంగా అమలు చేస్తున్నారు. నగరంలోని మార్కెట్లలో పాలిథిన్‌ కవర్లు వాడితే జరిమానా విధిస్తున్నారు. వాటి స్థానంలో పర్యావరణహితంగా ఉండే నూలు సంచులు వాడాలని సూచిస్తున్నారు. అయిదు ప్రధాన కూడళ్లలో నూలు సంచుల ఏటీఎంలను ఏర్పాటు చేశారు. పది రూపాయల నోటు లేదా నాణేన్ని యంత్రంలో ఉంచితే, కొన్ని సెకన్లలో నూలు సంచి బయటకు వస్తుంది. దీనికి యూపీఐ సౌకర్యాన్ని కూడా ఏర్పాటు చేశారు.