JEE Advanced: 75% మార్కులు రాకపోయినా జేఈఈ అడ్వాన్స్‌డ్‌కు హాజరవ్వొచ్చు

పర్సంటైల్‌లో అగ్రస్థానంలో ఉన్నవారికి మినహాయింపు

దిల్లీ: ప్రతి విద్యామండలిలో పర్సంటైల్‌లో అగ్రస్థానంలో ఉన్న తొలి 20 మందికి ఐఐటీ, ఎన్‌ఐటీ ప్రవేశ పరీక్షలో ఒక సడలింపు లభించనుంది. 12వ తరగతిలో వారు కనీసం 75% మార్కులు సాధించకపోయినా ఈ ప్రవేశాల కోసం జేఈఈ అడ్వాన్స్‌డ్‌ పరీక్షకు హాజరుకావచ్చని కేంద్ర విద్యాశాఖ వర్గాలు వెల్లడించాయి. ఇలాంటి సడలింపు ఇవ్వాలంటూ చాలాకాలం నుంచి డిమాండ్లు వస్తున్నాయి. ‘అనేక రాష్ట్రాల్లో పర్సంటైల్‌లో అగ్రస్థానంలో ఉంటున్న అభ్యర్థులు 12వ తరగతిలో 75% (అంటే 350) మార్కుల్ని సాధించలేకపోతున్నారు. అలాంటివారందరికీ తాజా నిర్ణయం ఉపయోగపడుతుంది. జేఈఈ-మెయిన్‌ తొలి విడతకు ఆన్‌లైన్‌లో నమోదుకు గడువు ఈ నెల 12వ తేదీతో ముగియనుంది. మరోవైపు- ఈ నెల చివరివారంలో జరగాల్సిన జేఈఈ మెయిన్స్‌ పరీక్షల్ని వాయిదా వేయాలన్న వినతిని బొంబాయి హైకోర్టు మంగళవారం తిరస్కరించింది.