పేజీకో కరెన్సీ నోటు.. పుస్తకంలో రూ.74లక్షలు

అక్రమంగా విదేశీ కరెన్సీ, బంగారం తీసుకొస్తున్న ఇద్దరు విదేశీయులను ముంబయి విమానాశ్రయంలో కస్టమ్స్‌ అధికారులు పట్టుకున్నారు. రెండు వేర్వేరు ఘటనల్లో వీరిని అరెస్టు చేశారు. జనవరి 22 అర్ధరాత్రి తర్వాత ముంబయి ఎయిర్‌పోర్టుకు చేరుకున్న ఓ విదేశీ ప్రయాణికుడు అనుమానాస్పదంగా కన్పించడంతో అతడి లగేజీని పరిశీలించారు. ఈ తనిఖీల్లో రెండు పుస్తకాల్లో దాచిన డాలర్ల కట్టలు బయటపడ్డాయి. పుస్తకాల పేజీల మధ్య నోట్లను అతికించాడు. మొత్తం 90వేల డాలర్ల (దాదాపు రూ.74లక్షలు)ను గుర్తించారు. ఆ డబ్బుకు సంబంధించి పత్రాలు లేకపోవడంతో అతడిని అదుపులోకి తీసుకున్నారు. ఇదే విమానాశ్రయంలో దుబాయి నుంచి వచ్చిన పాలస్తీనాకు చెందిన మరో ప్రయాణికుడి నుంచి 2.5 కిలోల బంగారాన్ని అధికారులు స్వాధీనం చేసుకున్నారు. సదరు వ్యక్తి ఆ బంగారాన్ని పేస్ట్‌ రూపంలో దాచి తీసుకురాగా.. తనిఖీల్లో బయటపడింది. దీంతో అతడిని అరెస్టు చేశారు.