రూ. 50 కోట్లు ఇవ్వండి.. లేదంటే తీవ్ర పరిణామాలు

పారిశ్రామికవేత్త నవీన్‌ జిందాల్‌ను బెదిరిస్తూ లేఖ

రాయ్‌గఢ్‌: ప్రముఖ పారిశ్రామికవేత్త, కాంగ్రెస్‌ మాజీ ఎంపీ నవీన్‌ జిందాల్‌ ను బెదిరిస్తూ ఓ లేఖ రావడం కలకలం సృష్టించింది. రూ. 50కోట్లు ఇవ్వాలని ఆగంతకుడు అందులో డిమాండ్‌ చేశాడు. దీంతో అప్రమత్తమైన పోలీసులు లేఖపై దర్యాప్తు చేపట్టగా.. ఓ ఖైదీ దాన్ని పంపించినట్లు తేలింది. ఛత్తీస్‌గఢ్‌లోని పాత్రపాలిలో ఉన్న జిందాల్‌ స్టీల్‌ అండ్‌ పవర్‌ లిమిటెడ్‌ ఫ్యాక్టరీకి గతవారం పోస్టు ద్వారా ఓ లేఖ వచ్చింది. నవీన్‌ జిందాల్‌ 48 గంటల్లోగా రూ.50కోట్లు ఇవ్వాలని, లేదంటే తీవ్ర పరిణామాలను ఎదుర్కోవాల్సి వస్తుందని హెచ్చరిస్తూ ఓ ఆగంతుకుడు ఆ బెదిరింపు లేఖను పంపాడు. దీంతో జిందాల్‌ కంపెనీ పోలీసులకు ఫిర్యాదు చేసింది. ఈ ఘటనపై పోలీసులు దర్యాప్తు చేపట్టగా.. బిలాస్‌పుర్‌ సెంట్రల్‌ జైలులోని ఓ ఖైదీ దీన్ని పంపినట్లు తేలింది. దీంతో అతడిపై పోలీసులు కేసు నమోదు చేశారు. నిందితుడు ఎవరనే వివరాలను మాత్రం బయటపెట్టలేదు. ఘటనపై దర్యాప్తు చేపట్టినట్లు పోలీసులు వెల్లడించారు.