మమతా బెనర్జీ సమక్షంలో.. బెంగాల్‌ గవర్నర్‌ అక్షరాభ్యాసం

తొలి అక్షరం నేర్పించిన 9 ఏళ్ల బాలిక

కోల్‌కతా: సరస్వతీ పూజను పురస్కరించుకొని పశ్చిమ బెంగాల్‌ గవర్నర్‌ సి.వి.ఆనంద్‌ బోస్‌కు గురువారం అక్షరాభ్యాసం జరిగింది. రాష్ట్ర ముఖ్యమంత్రి మమతా బెనర్జీ సహా పలువురు ప్రముఖుల సమక్షంలో రాజ్‌భవన్‌ వేదికగా నిర్వహించిన ఈ క్రతువులో.. దియాంగ్షీ రాయ్‌ అనే తొమ్మిదేళ్ల బాలిక (మూడో తరగతి) బెంగాలీ అక్షరమాలలోని తొలి అక్షరాన్ని ఎలా రాయాలో బోస్‌కు నేర్పించింది. నాలుగో తరగతి చదువుతున్న మరో ఇద్దరు చిన్నారులు ఆయనకు.. ‘మా’ (అమ్మ), ‘భూమి’ (పుడమి) అనే బెంగాలీ పదాల అర్థాలను తెలియజేశారు. గురుదక్షిణ కింద ఆ ముగ్గురు పిల్లలకు బోస్‌ ఒక్కొక్కరికీ ఒక వెండి నాణెంతో పాటు డ్రాయింగ్‌ పుస్తకాల సంచిని అందజేశారు.