భూవివాదంపై అమర్త్యసేన్‌కు మళ్లీ విశ్వభారతి లేఖ

కోల్‌కతా: నిజం ఏంటో, అబద్ధం ఏంటో గ్రహించలేని వ్యక్తి వైస్‌ ఛాన్సలర్‌ బాధ్యతల్లో ఉండటం బాధాకరమని విశ్వభారతి విశ్వవిద్యాలయ ఉపకులపతిని ఉద్దేశించి అమర్త్యసేన్‌ వ్యాఖ్యానించారు. వర్సిటీలో ఆక్రమించిన భూమిని తక్షణమే అప్పజెప్పాలని నోబెల్‌ గ్రహీత సేన్‌కు వర్సిటీ శుక్రవారం మరోసారి లేఖ రాసింది. ‘‘మీరు నివాసం ఉంటున్న భూమి విస్తీర్ణం 1.38 ఎకరాలు. చట్టపరంగా మీ భూమి 1.25 ఎకరాలు మాత్రమే. ఆక్రమించిన భూమిని తక్షణమే తిరిగి ఇచ్చేయండి లేదా చట్టపరమైన సమస్యలు ఎదుర్కోవాల్సి వస్తుంది’’ అని లేఖలో తెలిపింది. దీనిపై స్పందించిన ఆర్థికవేత్త.. ‘‘ఒకరిపై ఒకరు వాగ్వాదం చేసుకుంటూ పోతుంటే అది కొనసాగుతూనే ఉంటుంది. దీనివల్ల ఏం సాధిస్తాం. నిజానికీ అబద్ధానికీ తేడాను గ్రహించలేని వ్యక్తి ఉపకులపతి హోదాలో ఉండటం బాధాకరం. ఆయనతో నేను మాట్లాడటానికి సిద్ధంగా ఉన్నాను’’ అన్నారు. మూడురోజుల వ్యవధిలోనే భూవివాదంపై సేన్‌కు ఇలా లేఖ రాయడం ఇది రెండోసారి. ఇప్పటికే మొదటి లేఖకు స్పందిస్తూ.. మీ వైఖరి వెనుక ఉన్న రాజకీయ ఉద్దేశం ఏంటో నాకు అర్థం కావట్లేదు అని అమర్త్యసేన్‌ అన్నారు.