కొలీజియం నిర్ణయం సర్కారుకు శిరోధార్యం

పూర్వ న్యాయమూర్తి జస్టిస్‌ రోహింటన్‌ ఫాలీ నారిమన్‌

ముంబయి: కొలీజియం వ్యవస్థపై కేంద్ర న్యాయశాఖ మంత్రి కిరణ్‌ రిజిజు చేస్తున్న విమర్శలను సుప్రీంకోర్టు మాజీ న్యాయమూర్తి జస్టిస్‌ రోహింటన్‌ ఫాలీ నారిమన్‌ గట్టిగా ఖండించారు. కొలీజియం సిఫార్సు చేసిన న్యాయమూర్తుల పేర్లను ఖరారు చేయకుండా కేంద్రం తొక్కిపెట్టడం ప్రజాస్వామ్యానికి పెను ముప్పు తెస్తుందని హెచ్చరించారు. ముంబయి వర్సిటీలో నిర్వహించిన ఓ కార్యక్రమంలో జస్టిస్‌ నారిమన్‌ ప్రసంగించారు. కొలీజియం పంపిన న్యాయమూర్తుల జాబితాపై కేంద్రం 30 రోజుల్లో తన నిర్ణయాన్ని ప్రకటించకపోతే, ఇక ప్రభుత్వానికి చెప్పడానికి ఏమీ లేదని భావించాలనీ, ఈ మేరకు అయిదుగురు న్యాయమూర్తులతో కూడిన సుప్రీంకోర్టు ప్రత్యేక ధర్మాసనం తీర్పు వెలువరించాలని ఆయన సూచించారు. స్వతంత్రంగా, నిర్భయంగా వ్యవహరించే న్యాయమూర్తులను నియమించకపోతే స్వతంత్ర న్యాయవ్యవస్థ ఎలా ఏర్పడుతుందని ప్రశ్నించారు. అటువంటి న్యాయ వ్యవస్థ లేకుంటే దేశం కొత్త చీకటి యుగంలోకి ప్రవేశిస్తుందని ఆయన హెచ్చరించారు. కొలీజియం పద్ధతిని విమర్శిస్తున్న కేంద్ర మంత్రి రిజిజు రాజ్యాంగ మౌలికాంశాలను తెలుసుకోవాలన్నారు. 1990ల వరకు భారత రాష్ట్రపతి... సీజేఐని సంప్రదించి న్యాయమూర్తులను నియమించే పద్ధతి ఉండేది. ప్రధానంగా సీజేఐ సలహా ప్రకారమే నియామకాలు జరిగేవని నారిమన్‌ వివరించారు. తరవాత ప్రధాన న్యాయమూర్తితో పాటు సీనియర్‌ న్యాయమూర్తులను కూడా సంప్రదించే పద్ధతి వచ్చిందని చెప్పారు. భారత్‌లో రాజ్యాంగానికి భాష్యం చెప్పే బాధ్యతను కనీసం అయిదుగురు న్యాయమూర్తుల ధర్మాసనం నిర్వహిస్తుందని గుర్తుచేశారు. ఈ ధర్మాసనం నిర్ణయాన్ని ప్రభుత్వం శిరసావహించాలని స్పష్టం చేశారు.