విమానం అత్యవసర ద్వారం కవర్‌ తొలగింపు యత్నం

ముంబయి: గాలిలో ఉన్న విమానంలో ఓ ప్రయాణికుడు అత్యవసర ద్వారం కవర్‌ను తొలగించేందుకు యత్నించడం కలకలం రేపింది. ‘నాగ్‌పుర్‌ నుంచి ముంబయికి వస్తున్న ఇండిగో విమానంలో ఓ ప్రయాణికుడు.. అత్యవసర ద్వారం కవర్‌ను తొలగించేందుకు యత్నించాడు. ఆ సమయంలో విమానం ల్యాండింగ్‌కు సిద్ధంగా ఉంది. ఈ భద్రతా ఉల్లంఘనను గుర్తించిన సిబ్బంది.. వెంటనే కెప్టెన్‌ను అప్రమత్తం చేశారు. ఈ విషయమై సదరు ప్రయాణికుడిని హెచ్చరించారు’ అని ఇండిగో సంస్థ ఒక ప్రకటనలో తెలిపింది. ఎమర్జెన్సీ ఎగ్జిట్‌ను అనధికారికంగా ట్యాంపరింగ్‌ చేసినందుకుగానూ అతనిపై ఎఫ్‌ఐఆర్‌ నమోదైనట్లు ఎయిర్‌లైన్స్‌ తెలిపింది.