ఒడిశా మంత్రి నబ కిశోర్‌ దాస్‌కు కన్నీటి వీడ్కోలు

భువనేశ్వర్‌, న్యూస్‌టుడే: ఒడిశా మంత్రి నబ కిశోర్‌ దాస్‌ అంత్యక్రియలు సోమవారం ఝార్సుగుడలో అధికార లాంఛనాలతో ముగిశాయి. తమ అభిమాన నాయకుడిని కడసారి చూసేందుకు ప్రజలు భారీగా తరలివచ్చారు. ఆదివారం రాత్రి భువనేశ్వర్‌లో పోస్టుమార్టం చేసిన అనంతరం ఆయన  పార్థివదేహాన్ని అధికార నివాసానికి తీసుకొచ్చారు. సోమవారం ఉదయం గవర్నర్‌ ఆచార్య గణేశీలాల్‌, సీఎం నవీన్‌ పట్నాయక్‌, ఎంపీలు, ఎమ్మెల్యేలు సందర్శించి నివాళులర్పించారు. అనంతరం పార్థివదేహాన్ని విమానంలో ఝార్సుగుడ తరలించారు. మంత్రి మృతికి సంతాపంగా ఝార్సుగుడలో వ్యాపార సంస్థలు మూసివేశారు. మధ్యాహ్నం ఖెరువాల్‌ మన్మోహన్‌ మైదానంలో అధికార లాంఛనాలతో అంత్యక్రియలు నిర్వహించారు. నబ కిశోర్‌ చితికి ఆయన కుమారుడు విశాల్‌ దాస్‌ నిప్పంటించారు. ప్రభుత్వం మంగళవారం వరకు సంతాపదినాలు ప్రకటించింది. ఆదివారం ఉదయం ఓ కార్యక్రమంలో పాల్గొనేందుకు వచ్చిన మంత్రిని ఏఎస్సై గోపాల్‌ దాస్‌ తుపాకీతో కాల్చి హతమార్చిన విషయం తెలిసిందే.