ఆగ‘మేఘాల’పై గుండె తరలింపు

సైనికుడి ప్రాణాలు నిలిపేందుకు వాయుసేన విమానాలు  

దిల్లీ: మధ్యప్రదేశ్‌లో 34 ఏళ్ల జీవన్మృతుడు (బ్రెయిన్‌ డెడ్‌) నుంచి సేకరించిన గుండె ఒక సైనికుడికి ప్రాణదానం చేయనుంది. ఈ అవయవాన్ని సోమవారం ఇందౌర్‌ నుంచి పుణెకు తరలించారు. ఈ ఆపరేషన్‌లో వాయుసేనకు చెందిన రెండు విమానాలు సమన్వయంతో పనిచేశాయని అధికారులు తెలిపారు. ఉజ్జయినికి చెందిన కూరగాయల వ్యాపారి ప్రదీప్‌ అశ్వనీ ఈ నెల 20న రోడ్డు ప్రమాదానికి గురయ్యాడు. అందులో అతడి తలకు బలమైన దెబ్బ తగిలింది. నాటి నుంచి ఇందౌర్‌లోని ఒక ఆసుపత్రిలో అతడికి చికిత్స అందించారు. అతడి పరిస్థితి ఏ మాత్రం మెరుగుపడలేదు. అతడిని బ్రెయిన్‌ డెడ్‌గా వైద్యులు ప్రకటించారు. ఈ బాధను దిగమింగుకొని అతడి అవయవాలను దానమివ్వాలని కుటుంబ సభ్యులు నిర్ణయించారు. సైనిక డాక్టర్లు వచ్చి ప్రదీప్‌ నుంచి గుండె సేకరించి, ప్రత్యేక విమానంలో పుణెకు తరలించారు. హృద్రోగంతో బాధపడుతున్న సైనికుడికి ఈ అవయవాన్ని అమర్చనున్నారని, ఇది తమ కుటుంబానికి గర్వకారణమని బాధితుడి సోదరి నీలమ్‌ పేర్కొన్నారు. ప్రదీప్‌ దేహం నుంచి మూత్రపిండాలు, కాలేయం, కళ్లను కూడా సేకరించి స్థానిక ఆసుపత్రులకు తరలించారు.