అత్యాచారం కేసులో ఆశారాంకు మరో జీవిత ఖైదు

శిక్షను ప్రకటించిన గుజరాత్‌ కోర్టు

అహ్మదాబాద్‌: శిష్యురాలిపై అత్యాచారానికి పాల్పడిన కేసులో ఆశారాం బాపూ(81)ని సోమవారం దోషిగా తేల్చిన కోర్టు.. అతడికి జీవితఖైదు, రూ.50 వేల జరిమానా విధిస్తూ తీర్పు చెప్పింది. శిక్షను నిర్ధారించేందుకు మంగళవారం వాదనలు విన్న గాంధీనగర్‌ సెషన్స్‌ కోర్టు ఈ మేరకు తన తీర్పును వెలువరించింది. బాలికపై అత్యాచారం చేసినందుకు జీవితఖైదు అనుభవిస్తున్న ఆశారాంను నేర స్వభావం ఉన్న వ్యక్తిగా పరిగణించాలని ప్రాసిక్యూషన్‌ వాదించింది. అతడికి జీవితఖైదు విధించాలని విజ్ఞప్తి చేసింది. వాదనలు విన్న న్యాయమూర్తి డీకే సోనీ.. ఆశారాంకు జీవితఖైదు, జరిమానా విధిస్తూ తీర్పు చెప్పారు. జరిమానా మొత్తాన్ని బాధితురాలికి నష్టపరిహారంగా ఇవ్వాలని ఆదేశించారు. దృశ్య మాధ్యమం ద్వారా ఆశారాం విచారణలో పాల్గొన్నారు. ఈ తీర్పును గుజరాత్‌ హైకోర్టులో సవాలు చేయనున్నట్లు ఆయన తరపు న్యాయవాది ప్రకటించారు.