కుక్కలను ప్రేమించాలంటూ.. 517కి.మీల సైకిల్‌ యాత్ర

మూగజీవాలను కాపాడేందుకు వినూత్న యాత్రకు శ్రీకారం చుట్టారు ఇద్దరు తోబుట్టువులు. కుక్కల్ని కాపాడాలి.. వాటిని ప్రేమించాలి అనే సందేశంతో 517కి.మీ. సైకిల్‌ యాత్ర చేపట్టారు. వారు పశ్చిమ బెంగాల్‌కు చెందిన దీప్తో రాయ్‌, అతడి సోదరి చందా పంజా. దీప్తో రాయ్‌ ఓ స్టీల్‌ ప్లాంట్‌లో ఉద్యోగం చేస్తుండగా.. సోదరి పాఠశాల ఉపాధ్యాయురాలు. చిన్నప్పటి నుంచి వీరికి జంతువులంటే ఇష్టం. శునకాల సంరక్షణపై అవగాహన కల్పించడంతోపాటు అనారోగ్యానికి గురైనవాటికి చికిత్స అందించే లక్ష్యంతో ఈ యాత్ర కొనసాగిస్తున్నారు. అందుకోసం ఔషధాలు, వైద్య పరికరాలను వెంట తీసుకెళ్తున్నారు. ఒడిశాలోని భువనేశ్వర్‌ వరకూ యాత్ర చేస్తామని వారు తెలిపారు.