12 వేల అడుగుల ఎత్తులో ఐస్‌ స్కేటింగ్‌ ట్రాక్‌

నాకో సరస్సులో సరికొత్త ప్రపంచ రికార్డు

కిన్నౌర్‌(హిమాచల్‌ ప్రదేశ్‌): హిమాచల్‌ ప్రదేశ్‌ కిన్నౌర్‌ జిల్లాలోని నాకో సరస్సు వద్ద సరికొత్త ప్రపంచ రికార్డు నమోదైంది. 12 వేల అడుగుల ఎత్తులో సహజసిద్ధంగా ఉన్న ఈ సరస్సులో పొడవైన ఐస్‌ ట్రాక్‌ తీర్చిదిద్ది ఈ ఘనత సాధించారు. అంతర్జాతీయ ప్రమాణాలకు అనుగుణంగా దీన్ని సిద్ధం చేశారు. ఇక్కడ మైనస్‌ 18 డిగ్రీల వాతావరణంలో శనివారం జాతీయ స్థాయి ఐస్‌ స్కేటింగ్‌ పోటీలు ఉత్సాహంగా ప్రారంభమయ్యాయి. 15 రాష్ట్రాల నుంచి 70 మంది క్రీడాకారులు ఈ పోటీల్లో పాల్గొంటున్నారు. ఐస్‌ స్కేటింగ్‌ అసోసియేషన్‌ ఆఫ్‌ ఇండియా ఆధ్వర్యంలో రెండు రోజుల పాటు నిర్వహించనున్న ఈ పోటీలు ఆదివారం ముగుస్తాయి.