యువత క్రీడారంగంలో ఉపాధి పొందేలా ప్రోత్సాహం

ఫిట్‌గా ఉంటేనే ఇక్కడ సూపర్‌ హిట్‌
ప్రధాని నరేంద్రమోదీ

జైపుర్‌:  క్రీడారంగంలో ఉపాధి పొందే విధంగా యువతను తమ ప్రభుత్వం ప్రోత్సహిస్తోందని ప్రధాని మోదీ వెల్లడించారు. రాజస్థాన్‌కు చెందిన జైపుర్‌ రూరల్‌ ఎంపీ రాజ్యవర్థన్‌ సింగ్‌ రాథోడ్‌ నిర్వహిస్తున్న ‘జైపుర్‌ మహాఖేల్‌’ కార్యక్రమంలో దృశ్యమాధ్యమ విధానం ద్వారా మోదీ ఆదివారం ప్రసంగించారు. 2014లో ఇచ్చిన రూ.850 కోట్లతో పోలిస్తే ఈ రంగానికి ప్రస్తుత బడ్జెట్‌లో మూడొంతులు ఎక్కువగా రూ.2500 కోట్ల నిధులు కేటాయించామని మోదీ గుర్తుచేశారు. క్రీడాకారులకు అవార్డులతో ఇచ్చే నగదు ప్రోత్సాహకాల మొత్తాన్ని ఇతోధికంగా పెంచామన్నారు. యువత పేదరికం కారణంగా వెనకబడకూడదని ఉత్తమ ప్రదర్శన చేసిన ఆటగాళ్లకు సంవత్సరానికి రూ.ఐదు లక్షల వరకు ఇస్తున్నట్లు తెలిపారు. ఫిట్‌గా ఉంటేనే ఈ రంగంలో హిట్‌ అవుతామని క్రీడాకారులకు సూచించారు. ఒలింపిక్స్‌ వంటి ప్రపంచస్థాయి పోటీల్లో గెలవడమే లక్ష్యంగా ప్రయత్నించాలని మోదీ దిశానిర్దేశం చేశారు.