వాట్సప్‌ నంబరుకు ఆర్డరిస్తే.. రైళ్లలో నచ్చిన ఆహారం

దిల్లీ: రైళ్లలో ప్రయాణికులు తమకు నచ్చిన ఆహార పదార్థాలు.. నచ్చిన హోటళ్లు, రెస్టారెంట్ల నుంచి ఆర్డరిచ్చే సౌకర్యం త్వరలో అందుబాటులోకి రానుంది. ఇందుకోసం వాట్సప్‌ నంబరును ప్రవేశపెడుతున్నారు. ఐఆర్‌సీటీసీ ఇప్పటికే ఇ-కేటరింగ్‌ పేరుతో కొన్ని ఎంపిక చేసిన రైళ్లలో వాట్సప్‌ నంబరు 8750001323 ద్వారా ఆహారం అందజేస్తోంది. దీనికోసం ప్రత్యేకంగా www.catering.irctc.co.in  వెబ్‌సైట్‌, ‘ఫుడ్‌ ఆన్‌ ట్రాక్‌’ పేరిట యాప్‌ను అభివృద్ధి చేసింది. ప్రయాణికుడు ఇ-టికెట్‌ బుక్‌ చేసినప్పుడు వెబ్‌సైట్‌లో ఇ-కేటరింగ్‌ ఐచ్ఛికాన్ని ఎంపిక చేసుకున్న వారికి సదరు వాట్సాప్‌ నంబరు నుంచి సందేశం వస్తుంది. దాన్ని క్లిక్‌ చేసి రైలులో ఆహారాన్ని ఆర్డర్‌ ఇవ్వొచ్చు. దీంతోపాటు ఇ-కేటరింగ్‌ వైబ్‌సైట్‌ ద్వారా ఆయా ప్రయాణ మార్గాల్లో వచ్చే పట్టణాలు, నగరాల్లోని హోటళ్లు, రెస్టారెంట్ల నుంచి నచ్చిన ఆహార పదార్థాలను ఆర్డరిచ్చే సౌలభ్యం కూడా ఉంది. ప్రయాణికుల అభిప్రాయాలు, సలహాలు తీసుకున్న అనంతరం ఈ సౌకర్యాన్ని ఇతర రైళ్లలో కూడా ప్రవేశపెడుతున్నట్లు సోమవారం రైల్వేకు చెందిన అధికార వర్గాలు తెలిపాయి.