Turkey Earthquake: దాచుకున్న డబ్బుతో తుర్కియే బాధితులకు జాకెట్లు

దిల్లీ బాలుడి పెద్ద మనసు

దిల్లీ: తుర్కియే, సిరియాల్లో భూకంపం సృష్టించిన విలయాన్ని టీవీలో చూసిన ఓ బాలుడి హృదయం ద్రవించిపోయింది. ముఖ్యంగా మంచు పడుతున్నప్పటికీ బయటే ముడుచుకు పడుకుంటున్న అక్కడి బాధితులను చూసి వారికోసం తన పరిధిలో ఏమైనా చేయాలని ఆలోచించాడు. ఆ బాలుడే దిల్లీకి చెందిన జైదాన్‌ ఖురేషీ. అనుకున్నదే తడవుగా వెంటనే తను దాచుకున్న రూ.7,500 తీసుకుని తండ్రిని వెంటపెట్టుకు వెళ్లి చలిలో ఉపయోగపడే 112 జాకెట్లను కొనేశాడు. మొత్తం ఖర్చు రూ. 22వేలు అయింది. తీరా చూస్తే తన దగ్గర రూ. ఏడువేల అయిదొందలే ఉన్నాయి. అయితే కుమారుడి ప్రయత్నాన్ని చూసి ముచ్చట పడ్డ తండ్రి కాశిఫ్‌ మిగతా సొమ్మును చెల్లించి వాటిని కొనుగోలు చేశారు. .జైదాన్‌ వెంటనే దిల్లీలోని తుర్కియే రాయబార కార్యాలయానికి తీసుకెళ్లి వాటిని విరాళంగా ఇచ్చేశాడు. త్వరగా బాధితులకు అందేలా చూడాలని అధికారులకు విజ్ఞప్తి చేశాడు.