వికటించిన మేకప్‌.. వధువు మొహంపై బొబ్బలు

పెళ్లికి నిరాకరించిన వరుడు 

హాసన, న్యూస్‌టుడే:  పెళ్లి సమీపిస్తున్న తరుణంలో వధువు తన ముఖ వర్చస్సు కోసం చేయించుకున్న మేకప్‌ వికటించింది. దీంతో ఆమెను చేసుకోనంటూ వరుడు భీష్మించాడు. కర్ణాటకలోని హాసన జిల్లాలో ఈ ఉదంతం చోటుచేసుకుంది. అరసికెరె తాలూకా జూజూరుకు చెందిన ఓ యువతి(25)కి వివాహం నిశ్చయమైంది. మరో పది రోజుల్లో పెళ్లనగా.. మేకప్‌ చేయించుకోవాలని ఆమెకు స్నేహితురాళ్లు సూచించారు. దీంతో ఆమె అరసికెరెలోని గంగశ్రీ బ్యూటీపార్లర్‌కు వెళ్లింది. ప్రత్యేక మేకప్‌ చేస్తానని చెప్పిన బ్యూటీషియన్‌.. యువతి ముఖానికి ఫౌండేషన్‌ రాసి, ఆవిరిపట్టింది. దీంతో బుగ్గలు బొబ్బలెక్కి.. మచ్చలు వచ్చి ముఖం కళావిహీనంగా మారిపోయింది. గాయాల తీవ్రత ఎక్కువగా ఉండటంతో ఆమెను కుటుంబసభ్యులు ఆసుపత్రిలో చేర్చారు. ప్రస్తుతం ఐసీయూలో చికిత్స పొందుతోంది. అలర్జీ కారణంగా ఈ పరిస్థితి తలెత్తి ఉండొచ్చని వైద్యులు చెప్పారు.  బ్యూటీషియన్‌ను పోలీసులు అదుపులోకి తీసుకున్నారు. వధువు ముఖాన్ని చూసిన వరుడు తనకు ఆమె వద్దంటూ వివాహాన్ని రద్దు చేసుకున్నాడు.