EPFO - Higher pension: 2014 సెప్టెంబరుకు ముందు రిటైరైన వారికి ముగిసిన గడువు

అధిక పింఛనుకు 91,258 దరఖాస్తులు

దిల్లీ: పదవీ విరమణ(2014 కన్నా ముందు) చెందిన సభ్యులకు...ఉద్యోగుల పింఛను పథకం-1995(ఈపీఎస్‌) కింద అధిక పింఛను ఐచ్ఛికం ఇవ్వడానికి గడువు శనివారంతో ముగిసింది.

ఈ కేటగిరీలో మార్చి 4వ తేదీ వరకు ఆన్‌లైన్‌లో 91,258 మంది దరఖాస్తు చేసుకున్నారని కేంద్ర కార్మిక శాఖ ఒక ప్రకటనలో తెలిపింది.

* అయితే, ఈపీఎస్‌లోని ఇతర సభ్యులు ఈ ఏడాది మే 3వ తేదీ వరకు అధిక పింఛను ఆప్షన్‌ కోసం దరఖాస్తు చేసుకోవచ్చని వెల్లడించింది.

* ఉద్యోగులు, యాజమాన్యం ఇవ్వాల్సిన సంయుక్త ఐచ్ఛికాని(జాయింట్‌ ఆప్షన్‌)కి సంబంధించిన ప్రక్రియపై అందరికీ అవగాహన కల్పించడం కోసం ఈపీఎఫ్‌వో చర్యలు తీసుకుంటుందని ఆ ప్రకటన వివరించింది.

* అధిక పింఛను కోసం.. 2014 సెప్టెంబరు ఒకటో తేదీ నాటికి ఈపీఎఫ్‌ సభ్యులుగా ఉన్న వ్యక్తుల్లో 8,897 మంది శనివారం వరకు తమ యాజమాన్యాలకు ఆన్‌లైన్లో దరఖాస్తు చేసుకున్నారు.

* సుప్రీంకోర్టు ఉత్తర్వులను అనుసరించి అధిక పింఛను పథకం కోసం ఈపీఎస్‌ సభ్యులు దరఖాస్తు చేసుకోవాలంటూ ఫిబ్రవరిలో ఈపీఎఫ్‌వో సర్క్యులర్‌ జారీ చేసిన విషయం తెలిసిందే.