‘నా భార్య అలిగింది.. 10 రోజులు సెలవు కావాలి’

ఎస్పీకి ఇన్‌స్పెక్టర్‌ లేఖ

ఉత్తర్‌ప్రదేశ్‌లోని ఫరూఖాబాద్‌లో ఓ పోలీసు అధికారి రాసిన సెలవు లేఖ సామాజిక మాధ్యమాల్లో వైరల్‌ అయ్యింది. గత 22ఏళ్లుగా తన భార్యను హోలీకి పుట్టింటికి తీసుకెళ్లనందుకు అలిగిందని.. ఆమెను శాంతపరచాలంటే 10 రోజులు సెలవు కావాలని పోలీస్‌ ఇన్‌స్పెక్టర్‌ ఎస్పీకి లేఖ రాశారు. పోలీసు కొలువులో సెలవులు దొరకడం లేదని,. అందువల్ల వివాహమైన 22 ఏళ్ల నుంచి తన భార్యను హోలీ రోజున పుట్టింటికి తీసుకెళ్లలేకపోయానని అందులో ఆవేదన వ్యక్తం చేశారు. ‘‘ఈసారి హోలీకి నా భార్య నాతో కలిసి పుట్టింటికి వెళ్లాలనుకుంటోంది. కచ్చితంగా నాకు సెలవులు అవసరం. సర్‌, నా సమస్యను పరిగణనలోకి తీసుకొని 10రోజుల పాటు సెలవు ఇవ్వాలని కోరుతున్నాను’’ అని ఇన్‌స్పెక్టర్‌ రాసిన లేఖను చదివిన ఎస్పీ గట్టిగా నవ్వినట్లు పోలీసు వర్గాలు తెలిపాయి. అయితే ఇన్‌స్పెక్టర్‌ కోరినట్లు పది రోజులు కాకుండా.. ఐదు రోజుల సెలవు మంజూరు చేసినట్లు వెల్లడించాయి.