Rajyasabha: ధన్‌ఖఢ్ అనూహ్య నిర్ణయం..రాజ్యసభ కమిటీల్లోకి ఛైర్మన్ వ్యక్తిగత సిబ్బంది

నిఘా కోసమేనంటూ కాంగ్రెస్‌ మండిపాటు

దిల్లీ: రాజ్యసభ కమిటీలకు అనుబంధంగా తన వ్యక్తిగత సిబ్బందిని నియమించడం ద్వారా ఉపరాష్ట్రపతి, సభ ఛైర్మన్‌ అయిన జగదీప్‌ ధన్‌ఖఢ్‌ కొత్త సంప్రదాయానికి తెరలేపారు. 20 రాజ్యసభ కమిటీలకు అనుబంధంగా 8 మంది తన సిబ్బందిని ఆయన నియమించారు. రాజ్యసభ సచివాలయం మంగళవారం అర్ధరాత్రి విడుదల చేసిన ఉత్తర్వుల ప్రకారం.. ఉపరాష్ట్రపతి కార్యాలయంలోని నలుగురితోసహా 8 మంది ఈ 20 కమిటీల్లో కొనసాగుతారు. నాలుగు పార్లమెంటరీ కమిటీలు, మరో నాలుగు పార్లమెంటరీ స్టాండింగ్‌ కమిటీల్లో ఈ నియామకాలు జరిగాయి. ఇలా నియమితులైన వారిలో ఉపరాష్ట్రపతి ఆఫీసర్‌ ఆన్‌ స్పెషల్‌ డ్యూటీ (ఓఎస్‌డీ), వ్యక్తిగత కార్యదర్శి, రాజ్యసభ ఛైర్మన్‌ ఓఎస్‌డీ ఉన్నారు. ఈ కమిటీల్లో ఎక్కువగా ప్రతిపక్ష నేతలు నేతృత్వం వహించేవే ఉన్నాయి. వాస్తవానికి రాజ్యసభ సెక్రటేరియట్‌ సిబ్బంది ఈ కమిటీలకు సహాయకులుగా ఉంటారు. ఈ విధానాన్ని తోసిరాజని ఉపరాష్ట్రపతి కొత్తగా తన సిబ్బందిని ఈ కమిటీల్లోకి చొప్పించారు. వీరంతా జూనియర్‌ స్థాయి అధికారులే. కమిటీలపై నిఘా కోసమే ఉపరాష్ట్రపతి ఈ నియామకాలు జరిపారని కాంగ్రెస్‌ నేతలు ఆరోపించారు. ఇవి సంప్రదాయాలకు విరుద్ధంగా జరిపిన నియామకాలని విమర్శించారు. దీనివల్ల రహస్యంగా ఉండాల్సిన కమిటీల కార్యకలాపాలు బహిరంగమవుతాయని పేర్కొన్నారు.