Currency: వెబ్‌ సిరీస్‌ సీన్‌ను తలపించేలా.. కారులోంచి కరెన్సీ విసిరేసిన యువకులు

చండీగఢ్‌: ఇటీవల విడుదలైన ఓ బాలీవుడ్‌ వెబ్‌ సీరిస్‌లోని సన్నివేశాన్ని తలపించేలా ఇద్దరు యువకులు కారులోంచి కరెన్సీ నోట్లు విసిరిన ఘటన హరియాణాలోని గురుగ్రామ్‌లో కలకలం రేపింది. దీనికి సంబంధించిన వీడియో సామాజిక మాధ్యమాల్లో వైరల్‌గా మారింది. రంగంలోకి దిగిన పోలీసు ఆ ఇద్దరిని అదుపులోకి తీసుకున్నారు. గురుగ్రామ్‌లోని గోల్ఫ్‌ కోర్స్‌ రోడ్డులో ఇద్దరు యువకులు కారులో ప్రయాణించారు. ఈ క్రమంలోనే ఒకరు వాహనం నడుపుతుండగా.. మరొకరు కారు వెనుకభాగం నుంచి రోడ్లపై కరెన్సీ నోట్లు విసిరాడు. అతడు ముఖానికి కర్చీఫ్‌ కప్పుకొని కనిపించాడు. అవి అసలు నోట్లా..? నకిలీవా తెలియరాలేదు. దిల్లీకి చెందిన ఓ యూట్యూబర్‌ ఈ పని చేసినట్లు తెలుస్తోంది. ఇటీవల విడుదలైన ‘ఫర్జీ’ వెబ్‌ సీరిస్‌లోని ఓ సన్నివేశంలోనూ.. ఇద్దరు కారులోంచి నకిలీ కరెన్సీ నోట్లను రహదారిపైకి విసురుతూ పోలీసుల నుంచి తప్పించుకునేందుకు యత్నిస్తారు. ఇదేవిధంగా ఆ దృశ్యాన్ని అనుకరించే యత్నంలో ఈ ఇద్దరు పోలీసులకు చిక్కారు.