రూ.2 కోట్ల విలువైన ఆస్తులు క్యాన్సర్‌ కేంద్రానికి దానం

చనిపోయే ముందు లేఖ రాసిన వృద్ధురాలు

చెన్నై(ఆవడి), న్యూస్‌టుడే: తమిళనాడులో ఓ వృద్ధురాలు తన రూ.రెండు కోట్ల విలువైన ఆస్తులను కాంచీపురం అన్నా క్యాన్సర్‌ కేంద్రానికి అందజేయాలని అధికారులనుద్దేశించి లేఖ రాసి మరణించారు. తిరువళ్లూరు జిల్లా ఆవడిలోని కామరాజర్‌నగర్‌కు చెందిన సుందరీబాయ్‌(54) గత నెల 17న క్యాన్సర్‌తో ఇంట్లో మృతిచెందారు. పోలీసుల దర్యాప్తులో.. మృతురాలు, ఆమె చెల్లి జానకి మాత్రమే ఇంట్లో ఉండేవారని గుర్తించారు. సుందరీబాయ్‌ మృతి చెందిన మూడు రోజుల ముందే జానకి చనిపోయినట్లు తెలిసింది. పోలీసులు, రెవెన్యూ అధికారులు ఆమె ఇంట్లో పరిశీలించగా.. ఓ పెట్టెలో 54 సవర్ల బంగారు నగలు, బ్యాంకు ఖాతాలో రూ.61 లక్షల నగదు ఉన్నట్లు పాస్‌బుక్‌, ఇంటిపత్రాలు, ఓ లేఖ కనిపించాయి. రూ.రెండు కోట్లు విలువచేసే నగదు, బంగారాన్ని కాంచీపురం ‘అన్నా’ క్యాన్సర్‌ చికిత్సా కేంద్రానికి అందజేయాలని లేఖలో రాసి ఉంది. దీంతో ఆవడి పోలీసు కమిషనర్‌ సందీప్‌రాయ్‌ రాథోడ్‌ ఆదేశాలతో పోలీసులు వాటిని ఈనెల 18న రెవెన్యూ అధికారులకు అప్పగించారు.