మహిళలకు ప్రతీనెలా రూ.వెయ్యి పంపిణీ

తమిళనాడు బడ్జెట్‌లో కీలక ప్రకటన

ఈనాడు, చెన్నై: తమిళనాడు రాష్ట్ర బడ్జెట్‌ను ఆర్థికమంత్రి పళనివేల్‌ త్యాగరాజన్‌ సోమవారం అసెంబ్లీలో ప్రవేశపెట్టారు. ఈ సందర్భంగా ఇంటి బాధ్యతలు చూసే మహిళలకు ‘మగళిర్‌ ఉరిమై తొగై (మహిళ హక్కుగా నగదు)’ పథకాన్ని ప్రకటించారు. డీఎంకే ఎన్నికల మేనిఫెస్టోలో ఇచ్చిన హామీ మేరకు ఈ పథకాన్ని ప్రకటిస్తున్నట్లు వెల్లడించారు. ఇందులో భాగంగా ఇంట్లో కుటుంబపెద్దగా ఉన్న మహిళకు ప్రతి నెలా రూ.వెయ్యి చొప్పున పంపిణీ చేసేలా ప్రకటన చేశారు. వచ్చే ఆర్థిక సంవత్సరం నుంచి అర్హులైనవారికి ఈ పథకం అందుబాటులోకి వస్తుందన్నారు. సెప్టెంబరు 15న అన్నాదురై జయంతి సందర్భంగా తమిళనాడు ముఖ్యమంత్రి ఎం.కె.స్టాలిన్‌ దీన్ని ప్రారంభిస్తారని త్యాగరాజన్‌ తెలిపారు. పెరిగిన గ్యాస్‌ ధరలు మహిళల్ని తీవ్ర వేదనకు గురిచేస్తున్నాయని, ఈ పథకంతో వారు ఊరట చెందుతారని ఆశాభావం వ్యక్తంచేశారు. ఈ పథకానికి తాజా బడ్జెట్లో రూ.7 వేల కోట్లు కేటాయించారు. అయితే అర్హులను ఏ ప్రాతిపదికన గుర్తిస్తారన్నది వెల్లడించలేదు. మరోవైపు యుద్ధంలో ప్రాణాలు కోల్పోయిన తమిళ సైనికులకు ఇచ్చే రాష్ట్ర ప్రభుత్వ ఎక్స్‌గ్రేషియాను రూ.20 నుంచి రూ.40 లక్షలకు పెంచారు. వివిధరకాల సేవా పతకాలు పొందిన తమిళ సైనికులకు ఇచ్చే గ్రాంటును 4 రెట్లు పెంచుతున్నామని తెలిపారు.