సీల్డ్‌ కవర్ల పద్ధతి నిలిపివేద్దాం

ఓఆర్‌ఓపీ కేసులో కేంద్ర ప్రభుత్వంపై సుప్రీంకోర్టు సీరియస్‌
మాజీ సైనికులకు పింఛను బకాయిల చెల్లింపులపై కాలపట్టిక నిర్దేశం
2024 ఫిబ్రవరి 28కల్లా పూర్తిచేయాలని ఆదేశం

దిల్లీ: అర్హులైన మాజీ సైనికులకు ఒకే ర్యాంకు-ఒకే పింఛను (ఓఆర్‌ఓపీ) బకాయిల చెల్లింపుపై తన అభిప్రాయాలను కేంద్ర ప్రభుత్వం సీల్డ్‌ కవర్‌లో అందజేయడంపై సుప్రీంకోర్టు సోమవారం ఆగ్రహం వ్యక్తం చేసింది. ఈ విధానానికి ముగింపు పలకాల్సిన అవసరం ఉందని వ్యాఖ్యానించింది. ఆ సీల్డ్‌ కవర్‌ను తిరస్కరిస్తూ...‘మేం ఎటువంటి రహస్య పత్రాలు, సీల్డ్‌ కవర్లు తీసుకోం. వ్యక్తిగతంగా నేను వాటికి వ్యతిరేకిని. న్యాయస్థానాల్లో పారదర్శకత ఉండాలి. ఈ కేసులో రహస్యం ఏముంది. మేమిచ్చిన ఆదేశాలు అమలు చేస్తున్నారు అంతేకదా. నేను ఈ సీల్డ్‌ కవర్‌ సంప్రదాయానికి ముగింపు పలుకుదామనుకుంటున్నా. దీనిని సుప్రీంకోర్టు అనుసరిస్తే..హైకోర్టులు అదే బాటలో పయనిస్తాయ’ని ప్రధాన న్యాయమూర్తి జస్టిస్‌ డి.వై.చంద్రచూడ్‌ వ్యాఖ్యానించారు. ఎవరి జీవితానికైనా ప్రమాదం కలుగుతుందని భావిస్తే, విశ్వసనీయ సమాచార మూలాల గురించి చెప్పేటప్పుడు ఈ పద్ధతిని అనుసరించవచ్చని అటార్నీ జనరల్‌కు సూచించారు. ధర్మాసనంలో జస్టిస్‌ పి.ఎస్‌.నరసింహా, జస్టిస్‌ జె.బి.పార్దీవాలా సభ్యులుగా ఉన్నారు. రూ.28వేల కోట్ల ఓఆర్‌ఓపీ బకాయిలను నాలుగు వాయిదాల్లో చెల్లిస్తామంటూ రక్షణ మంత్రిత్వ శాఖ ఏకపక్షంగా తీసుకున్న నిర్ణయంపై ఈ నెల 13న సుప్రీంకోర్టు మండిపడింది. ‘ఎంత మొత్తం చెల్లించాల్సి ఉంది? చెల్లింపుల్లో ప్రాధాన్యతలు, అందుకు ఎలాంటి విధివిధానాలను అనుసరించాలనే అంశాలపై ఈ నెల 20లోగా నివేదిక ఇవ్వాల’ని ఆదేశించింది. ఈ క్రమంలోనే కేంద్రం సోమవారం ఆ వివరాలను సమర్పించింది. అనంతరం కోర్టు తీర్పును వెలువరించింది.

ఇదీ చెల్లింపుల షెడ్యూలు..

మాజీ సైనికులకు 2019-2022లకు గాను చెల్లించాల్సిన రూ.28,000 కోట్ల బకాయిలు వచ్చే ఏడాది ఫిబ్రవరి 28 కల్లా చెల్లించాలని సుప్రీంకోర్టు ధర్మాసనం స్పష్టం చేసింది. మొత్తం 25 లక్షల మంది పింఛనుదారులకు గాను ఓఆర్‌ఓపీ పథకానికి 4లక్షల మంది అనర్హులు. ఈ నాలుగు లక్షల మంది ఇప్పటికే పెంచిన పింఛను పొందుతున్నారని ధర్మాసనం పేర్కొంది.

* యుద్ధంలో ప్రాణాలు కోల్పోయిన సైనికులకు చెందిన కుటుంబాలు, ధైర్యసాహసాల అవార్డుల విజేతలు కలిపి సుమారు ఆరు లక్షల మంది ఉంటారని, వారందరికీ ఒకే విడతలో బకాయిలను ఈ ఏడాది ఏప్రిల్‌30 లోగా చెల్లించాలని తెలిపింది.

* 70 ఏళ్లు, ఆపై వయసు మాజీ సైనికులు నాలుగైదు లక్షల మంది ఉంటారు. వారికి ఒకటి లేదా అంతకుమించిన వాయిదాల్లో ఈ ఏడాది జూన్‌ 30 కల్లా ఓఆర్‌ఓపీ బకాయిలు ఇచ్చేయాలి.

* మిగతా 10-11 లక్షల మంది పెన్షనర్లకు మూడు సమాన వాయిదాల్లో 2024, ఫిబ్రవరి 28 నాటికి మొత్తం బకాయిలను చెల్లించాలని ధర్మాసనం తీర్పులో స్పష్టం చేసింది.