చిరుతలు, మనుషులు కలిసి తిరుగాడే బెరా!.. ఎక్కడో తెలుసా?

మనకు కూతవేటు దూరంలో చిరుత సంచరిస్తోందని తెలిస్తేనే హడలిపోతాం. రాజస్థాన్‌లోని పాలీ జిల్లా బెరా గ్రామ ప్రజలు పక్కనే చిరుత ఉన్నా చూసీచూడనట్లు వెళతారు. ఇక్కడి చిరుతలు కూడా మనుషులకు ఏ మాత్రం హాని చేయకుండా స్వేచ్ఛగా తిరుగుతాయి. ఆరావళి పర్వతాలకు సమీపంలో ఈ ప్రాంతం ఉంటుంది. సుమారు 50 ఏళ్ల క్రితం ఇక్కడికి సమీపంలోని కుంభాల్‌గఢ్‌ జాతీయ పార్కు నుంచి 6 చిరుతలు తప్పించుకున్నాయి. అవి అటుఇటూ తిరుగుతూ.. చుట్టూ కొన్ని కొండగుహలు, అటవీప్రాంతం కూడా ఉండటంతో బెరా గ్రామ పరిసరాలను ఆవాసంగా మలుచుకున్నాయి. దీంతో వాటి సంతతి క్రమంగా వృద్ధి చెంది, 2020 నాటికి 50-60 చిరుతలు సంచరిస్తున్నట్లు గ్రామస్థుల అంచనా. చిరుతలు ఎక్కువగా ఉన్నాయని గుర్తించిన అటవీ అధికారులు ఈ ప్రాంతాన్ని జవాయ్‌ లెపర్డ్‌ కన్జర్వేషన్‌ జోన్‌గా ప్రకటించారు. రహదారిపై వెళ్తున్నప్పుడు మధ్యలో చిరుతలు కనిపిస్తే అవి వెళ్లేంతవరకు ఈ గ్రామస్థులు ముందుకు కదలరు. అప్పుడప్పుడూ చిరుతలు స్థానికులు పెంచే పశువులను వేటాడతాయి. దీన్ని దైవబలిగా గ్రామస్థులు భావిస్తారు.