బోరు నుంచి బంగారం పొడి!

కటక్‌, న్యూస్‌టుడే: బోరు నుంచి బురదతో పాటు బంగారు రంగుతో కూడిన పొడి వెలువడటంతో అధికారులు బోరును సీజ్‌ చేశారు. వెలువడిన మట్టి నమూనాను సేకరించి ల్యాబ్‌కు పరీక్షలకు పంపించారు. ఒడిశాలోని బొలంగీర్‌ జిల్లా చంచన బహాలి గ్రామంలో ఈ ఘటన చోటు చేసుకుంది. గ్రామానికి చెందిన రైతు మహమ్మద్‌ జావెద్‌ తన పొలంలో బోరు తవ్వించాడు. రెండు రోజుల నుంచి బోరు నుంచి బంగారు రంగుతో కూడిన పొడి వస్తోంది. దీంతో బంగారం వస్తుందనే వార్త ఆ ప్రాంతంలో ప్రచారమైంది. శనివారం తహసీల్దార్‌ ఆదిత్య మిశ్రాతో పాటు పలువురు అధికారులు మట్టి నమూనా సేకరించి అనంతరం బోరును సీజ్‌ చేశారు. సేకరించిన మట్టి నమూనాను ల్యాబ్‌కు పంపించామని, పరీక్షలు జరిగాక ఇది బంగారమా లేదా వేరే ధాతువా అనే విషయం ఖరారవుతుందని తహసీల్దార్‌ తెలిపారు.